《議事規則》@茶樓

2017.12.13


  四位茶客飲茶議事,談得興起,水花四濺……


茶客甲:好嘞好嘞!立法會終於有機會修改《議事規則》啦!以後睇立法會直播,唔使成日聽到點人數嘅鐘聲,煩死人……


茶客乙:咦,唔係話法定人數係《基本法》規定,可以改㗎咩?


修改全體委員會法定人數


茶客甲:《基本法》係有講明立法會大會的法定人數係全體議員嘅半數,即係三十五人。但係 家無人話要修改立法會嘅法定人數。佢哋嘅講法,完全係誤導。而家係講緊全體委員會嘅法定人數由三十五人改為二十人,舉個例子,立法會有好多會議,好似財會、內會、法案委員會,事務委員會等等,法定人數都係少過半數議員,所以今次修改全體委員會嘅法定人數,唔會違反《基本法》,大家唔好俾人誤導呀。


茶客丙:係呀。上個星期仲話要喺大會提咩嘢「97條91」,總之就係要調動議程,遲啲先傾《議事規則》。結果咪俾主席一句就KO咗,每項議案大約傾十個鐘頭,九七個議案,咪要傾足九百七十個鐘頭,大大話話要開一年半會議。大家都知道,去到投票,呢堆議案都唔會過得到啦,即係話,就算俾佢哋搞足一年半,倒頭來咪又係咩都無,呢啲咪蹉跎歲月囉……唔該班議員諗啲有建設性嘅嘢做吓啦。


六至七成人反對拉布


茶客丁:唉,呢啲都仲係「拉布1.0」咋,議員單打獨鬥,燃燒時間。而家佢哋已經去到「拉布2.0」,要有設計對白,仲夾埋對手戲。有個咩議員無啦啦搵到條《議事規則》,夾硬話要驅趕公眾人士及傳媒,將立法會變閉門會議,其實就係製造機會,俾佢哋班議員逐個起身反駁,解釋點解反對將立法會變成閉門會議……真係救命,佢哋喺議事堂自high,外面嘅人睇見,真係眼火爆。


茶客甲:民意好清楚啦!最近嘅調查都話有六至七成人反對「拉布」,支持「拉布」嘅只有一成半咋,民意根本係一面倒。所以最緊要我哋講多啲,做多啲,支持修改《議事規則》,俾多啲壓力啲「拉布」議員同埋佢哋嘅幫兇,叫佢哋唔好再與民為敵,我哋出糧俾你哋唔係想聽廢話。

茶客乙、丙、丁:支持……

新聞聯絡:刊於 星島日報 立法會議員、民建聯主席 李慧琼

  • Black Facebook Icon
  • Black YouTube Icon
  • Black Instagram Icon

訂閱資訊

 3582 1111     info@dab.org.hk

© 2020 by the DAB