兒童肥胖

2018.11.29


有一次,跟幾位朋友談起本港兒童肥胖的情況。


朋友甲說:「梗係啦!而家D嘢食營養好咗、啲人又生少咗、又冇我地以前咁窮,咁咪肥左囉,好正常架,我哋以前細個邊有咁多嘢食呀,個個得棚骨……」


朋友乙反駁:「淨係食嘢架咩!你都知架,我都有好多兄弟姊妹,以前細個一樣冇得食,我咪又係肥!個種係肥就肥架啦!」


朋友丙有點感受:「兩位大哥大姐,你哋講嘅都唔係話錯,不過我想講呢,甲你話而家人肥咗係好正常,乙你話個種係咁就係咁,呢兩點我真係唔認同。我個細女出世都唔係肥,我哋兩公婆都係瘦,但去到佢10歲個年就開始肥,之後多咗病痛,後來去問醫生、問營養師,改變飲食同生活習慣,身體先慢慢好,到而家17歲都算托賴啦!」


朋友丁指著自己手瓜:「叫細路跟我做運動啦!我同老婆仔女晚晚落街跑步,又舒服、又唔使錢,對眼可以休息下、成家人又可以傾吓偈,好過成日各有各篤住部手機!」


日前,香港中文大學健康教育及促進中心發表了一份與兒童肥胖有關的研究調查,調查在今年2月至4月訪問了536名小四學生,結果有幾個要點:(一)八成半學童每日攝取蔬果分量少於衛生署建議標準;(二)超過四成學童每星期會吃四次或以上油炸食物、加工肉類、汽水等;(三)八成學童運動量不足,即每天中等至高強度運動累計少於60分鐘。


這份研究調查,令筆者想起上述幾位朋友之間的對話。在新時代,食品和生活的變化、智能產品的出現等,都對學童的健康產生影響。根據衛生署在2016/17學年的數據顯示,大約每5名小學生便有一名屬於過重或肥胖;亦有研究指約四成至七成肥胖學童長大後若肥胖不減,患上糖尿病、高血壓等疾病的風險,會較正常體重人士高。


兒童肥胖問題過去在香港社會有一定討論,筆者知道不少家長亦很努力改善學童的飲食習慣,例如子女不喜歡吃蔬菜,家長願意花心思切成有趣的形狀,吸引他們多吃。宏觀而言,筆者建議政府牽頭作出跟進,除了宣傳之外,亦可在學校課程制定、食品監管、增加社區運動配套等各方面,多做具體工作、制定合適政策,為我們的下一代、以至整體香港市民的健康「升呢」!

刊於 都市日報

立法會議員、民建聯主席李慧琼

  • Black Facebook Icon
  • Black YouTube Icon
  • Black Instagram Icon

訂閱資訊

 3582 1111     info@dab.org.hk

© 2020 by the DAB